Меккеге ажылыкка 1,5 миллиондон ашык зыяратчы барды

25-майда Сауд Арабиясында мусулмандардын жыл сайын өтүүчү ажылык сапары башталды. BBC'нин маалыматына ылайык, бул жылы ажылыкка болжол менен 1,5 миллион адам барган.

Белгиленгендей, Жакынкы Чыгыштагы кырдаалга карабастан, быйыл ажылыкка келгендердин саны өткөн жылга салыштырмалуу көп болгон.

Буга чейин Сауд Арабиясынын Коргоо министрлиги калаада коопсуздук чаралары көрүлгөнүн маалымдаган болчу.

"Абадан коргонуу күчтөрү ыйык жайлардын үстүндөгү аба мейкиндигин коргоо жана бардык аба коркунучтарына каршы туруу үчүн жооп берет. Бул зыяратчылардын коопсуздугун жана тынчтыгын камсыз кылат",- деп айтылат билдирүүдө.

Саудиялык басылмалар зыяратчылардын агымын уюштуруу жана коопсуздук менен саламаттык сактоо кызматтарынын көзөмөлү жогорку деңгээлде жүргүзүлүп жатканын белгилешүүдө.