Исландия дүйнөдөгү эң кымбат өлкө деп табылды

Исландия жашоо чыгымдары боюнча дүйнөдөгү эң кымбат өлкө катары аныкталды. Бул тууралуу эл аралык басылмалар жазышты.

Жаңы маалыматтарга ылайык, өлкөдөгү жалпы баалар Европанын орточо деңгээлинен 84 пайыздан жогору. Исландия бул көрсөткүч боюнча көп жылдар бою эң кымбат өлкөлөрдүн катарында келген Швейцарияны да артта калтырды.

Айрыкча азык-түлүк баалары жергиликтүү калк жана туристтер үчүн өтө жогору экени айтылууда. Эт азыктары Европанын орточо баасынан 71 пайызга кымбатыраак экени белгиленген. Ошондой эле автоунаалар да болжол менен 40 пайыздан жогору баада сатылат.

Адистер мындай кымбатчылыкты жөн гана жогорку айлык менен түшүндүрүү жетишсиз экенин айтышууда. Өлкөдөгү салык жүгү, импортко көз карандылык, логистикалык чыгымдар жана рыноктогу атаандаштыктын салыштырмалуу начардыгы баалардын өсүшүнө таасир этүүдө.