Казакстан менен Өзбекстан жаңы Жол картасына кол коюшту

Астана шаарында Казакстан менен Өзбекстандын ортосунда кызматташуу боюнча жаңы Жол картасына кол коюлду. Бул тууралуу Акорданын басма сөз кызматы жазды.

Салтанатка Казакстандын президенти Касым-Жомарт Токаев жана Өзбекстандын президенти Шавкат Мирзиёев катышты.

Маалыматка ылайык, жаңы документ 2025-жылдын 14-15-ноябрында Казакстандын президентинин Өзбекстанга болгон мамлекеттик сапарынын жүрүшүндө жетишилген макулдашуулардын практикалык уландысы болуп саналат.

Жол картасы өнөр жай, мунай-химия, логистика, металлургия, агроөнөр жай комплекси, туризм жана “жашыл” энергетика тармактарын камтыйт. Документ эки өлкөнүн ортосунда биргелешкен долбоорлорду ишке ашырууга багытталган.

Ошондой эле Казакстандагы өзбекстандык кожоюндары бар компаниялардын саны өсүп жатканы белгиленди. 1-апрелден 1-майга чейин мындай юридикалык жактардын саны 9,6 миңден 10,1 миңге чейин көбөйгөн. Бир айдагы өсүш 510 компанияны түзгөн.

Мындан тышкары жакында Астана шаарында өткөн Жогорку Евразия экономикалык кеңешинин жыйынында Касым-Жомарт Токаев ЕАЭБ өлкөлөрүнүн товар жүгүртүүсү 100 миллиард доллардан ашышы мүмкүн экенин билдирген.