Бишкек ЖЭБине көмүр жеткирүү боюнча иште мамлекеттик лабораториянын жетекчиси кармалды

УКМК Бишкек шаарындагы Жылуулук электр борборуна жеткирилген көмүрдүн сапатын текшерүүгө байланыштуу кылмыш ишинин алкагында Жаратылыш ресурстары министрлигине караштуу "Борбордук лаборатория" мамлекеттик ишканасынын М.К. аттуу директорун кармады.

Атайын кызматтын маалымат борбору билдиргендей, шектүү көмүрдүн сапаты боюнча лабораториялык корутундуларды жасалма түрдө өзгөртүп, көрсөткүчтөрдү жогорулатуу схемасын уюштурган деп айыпталууда. Ошондой эле анын ЖЭБге көмүр жеткирген айрым жеке компаниялардын кызыкчылыгын көздөп, алардын ишмердүүлүгүн колдогону аныкталганы маалыматта кошумчаланды.

Учурда шектүү УКМКнын убактылуу кармоочу жайына киргизилип, тергөө иштери уланууда.