Франциянын бир жараны эбола вирусун жүктуруп алды

Францияда эбола вирусу бир жарандан аныкталды. Өлкөнүн Саламаттык сактоо министрлиги ал Конгодогу гуманитардык миссиядан кайтып келген дарыгер экенин билдирди.

Маалыматка ылайык, бейтап карантинге алынып, тиешелүү кызматтар аны менен байланышта болгон адамдарды аныктоо жана көзөмөлдөө иштерин жүргүзүүдө. Ошол эле учурда Европа калкы үчүн жалпы коркунуч деңгээли төмөн деп бааланууда.

Эске салсак, май айында Дүйнөлүк саламаттык сактоо уюму Борбордук Африкадагы эбола вирусунун жайылышына байланыштуу өзгөчө кырдаал жарыялаган. Оорунун очогу өлкөнүн чыгышындагы Итури провинциясында катталган. Кийинчерээк вирус коңшулаш Түндүк Киву жана Түштүк Киву провинцияларына, ошондой эле Уганда аймагына тараган.

Акыркы маалыматтар боюнча, жуктуруп алгандардын саны 1048 адамдан ашып, оорудан 260 адам каза болгон.

Reuters агенттиги билдиргендей, вирустун кеңири жайылуу коркунучу төмөн деп эсептелгени менен, бир катар өлкөлөрдүн аэропортторунда санитардык көзөмөл күчөтүлгөн.