Измирдеги ири өрт калктуу конуштарга коркунуч жаратууда (видео) 

Түркиянын Измир провинциясынын Дикили районунда ири өрт чыгып, калктуу конуштарга коркунуч жаратууда.

Жергиликтүү басылмалардын маалыматына ылайык, өрт алгач айыл чарба жерлеринен тутанып, катуу шамалдын кесепетинен токой тилкесине жайылып, турак жайларга жакын аймактарга чейин жетти.

Өрттү өчүрүүгө 7 учак, 8 тик учак, 35 өрт өчүрүүчү унаа, 4 бульдозер жана көп сандаган куткаруучу топтор тартылды. Учурда тилсиз жоо менен күрөшүүдө абадан да, жерден да чаралар көрүлүп жатат.

Бийлик тургундарды өзгөчө кырдаал кызматтарынын көрсөтмөлөрүн так аткарууга жана өрт коркунучу сакталган аймактарга барбоого чакырды.