Англиянын курама командасы тыңчылык коркунучунан улам Мексикага барууну кечеңдетти

Англиянын футбол боюнча улуттук курама командасы дүйнө чемпионатынын 1/8 финалында Мексикага каршы өтө турган беттешке даярдык көрүү үчүн Мехикого учууну кийинкиге жылдырды. Бул тууралуу Daily Mail басылмасы жазды.

Маалыматка ылайык, англиялыктар 1/16 финалда Конгонун Демократиялык Республикасынын курама командасын 2:1 эсебинде жеңгенден кийин дароо Мехикого жөнөбөстөн, АКШнын Канзас-Сити шаарындагы машыгуу базасына кайтып келишкен.

Мындай чечим башкы машыктыруучу Томас Тухель жана анын машыктыруучулар штабы тарабынан кабыл алынган. Алар команданын тактикалык пландары менен оюн схемалары сыртка чыгып кетпеши үчүн коопсуз шартта даярдык көрүүнү туура көрүшкөн. Daily Mail бул чечим мүмкүн болгон тыңчылык аракеттерине байланыштуу кооптонуудан улам кабыл алынганын белгилейт.