Google сүрөттөрдү секундалар ичинде жараткан эң ылдам Nano Banana 2 Lite моделин сунуштады

Google компаниясы сүрөттөрдү жасалма интеллект аркылуу жаратуучу жаңы Nano Banana 2 Lite моделин тааныштырды. Компаниянын маалыматына ылайык, бул сериядагы эң ылдам модель болуп саналат.

Иштеп чыгуучулардын айтымында, Nano Banana 2 Lite сүрөттөрдү тез жаратуу жана колдонуу чыгымдарын азайтуу максатында иштелип чыккан. Анын негизги артыкчылыгы – ылдамдыгы. Компаниянын маалыматы боюнча, нейротармак тексттик суроо-талаптын негизинде орточо төрт секундда сүрөт түзө алат.

«Миңдеген сүрөттөрдү жаратуу же татаал видеолорду түзөтүү керек болсо да, жаңы эки курал ишти тездетип, чыгармачыл идеяларды оңой ишке ашырууга мүмкүнчүлүк берет», — деп билдиришти Google компаниясынын өкүлдөрү.

Nano Banana 2 Lite корпоративдик кардарлар үчүн гана эмес, бардык колдонуучулар үчүн да жеткиликтүү. Модель азыртан тартып Gemini чат-ботунда акысыз колдонууга берилди. Бул үчүн Google аккаунтуна кирип, 3.1 Flash-Lite моделин тандоо жетиштүү. Gemini Advanced жазылуусу талап кылынбайт.

Компаниянын айтымында, жаңы модель тексттик тапшырмаларды так түшүнөт, сүрөттөрдүн ичине жазууларды туура жайгаштыра алат жана бир эле каармандын көрүнүшүн кайра-кайра түзгөндө өзгөртпөй сактап калат.