Бангкоктогу 27 адам каза болгон өрттүн себептери иликтенүүдө

12-июлга караган түнү Таиланддын борбору Бангкок шаарындагы концерттик барда чыккан ири өрттөн кеминде 27 адам каза болуп, дагы 63 адам жаракат алды. Бүгүн, 13-июлда тергөөчүлөр өрттүн себептерин аныктоо иштерин улантып жатканы белгилүү болду. Алдын ала маалымат боюнча, каза болгондордун көбү күйүктөн эмес, түтүнгө ууланып көз жумган.

Өрт Чатучак районундагы популярдуу сыра барында чыккан. Окуя болгон учурда имаратта 300гө жакын адам болгон. Өрт тууралуу сигнал саат 23:48де түшүп, жалын бир нече мүнөт ичинде имаратка жайылган.

Күбөлөрдүн айтымында, өрт сахнанын жанындагы электр жабдууларынан башталган. Азырынча кырсыктын так себеби айтыла элек, бирок тергөөчүлөр электр системинин бузулушу жана өрт коопсуздугунун талаптарынын сакталбашы сыяктуу версияларды карап жатышат.