Тарбия мекемесиндеги өспүрүм ооруканага түштү

№14 тарбия мекемесинде жаза мөөнөтүн өтөп жаткан 17 жаштагы өспүрүм имаратынын үчүнчү кабаттын терезесинен кулап, эки бутунан жаракат алды. Маалыматты Жазаларды аткаруу мамлекеттик кызматынын басма сөз кызматы тастыктады.

Билдирүүдө айтылгандай, окуя 10-июлда болжол менен саат 11:15 чамасында болгон. Жабырлануучуга мекеменин кызматкерлери биринчи медициналык жардам көрсөтүшүп, андан ары Кант шаарынын шаардык ооруканасына жеткирилген. Өспүрүмдүн буттарына операция жасалган.

Учурда ал орукананын травматология бөлүмүнө которулуп дарыланууда. Болгон окуянын бардык жагдайларын аныктоо иштери жүргүзүүдө. Ошондой эле кызматтык иликтөө дайындалган.

Маалымдама: Өспүрүм былтыр январ айында Ош шаардык сотунун өкүмүнүн негизинде Кылмыш-жаза кодексинин 205-беренесинин 2-бөлүмү жана 3-бөлүмү боюнча күнөөлүү деп табылып, 2 жыл 6 ай мөөнөткө эркинен ажыратылган.