Түркияда Израилдин премьер-министрин камакка алуу боюнча эл аралык ордер берилди

Түркиянын Стамбул шаарындагы Жогорку кылмыш иштери боюнча соту Израилдин премьер-министри Биньямин Нетаньяхуга карата Интерпол аркылуу эл аралык издөө жарыялоо чечимин чыгарды. Түркиянын маалымат каражаттары билдиргендей, мындай чечим Газа тилкесине гуманитардык жардам алып бара жаткан флотилиянын кармалышына байланыштуу кабыл алынган.

Гуманитардык флотилияга байланыштуу иш

Сөз Global Sumud Flotilla аттуу гуманитардык флотилия тууралуу болуп жатат. Ал Газа тилкесине гуманитардык жардам жеткирүүгө аракет кылган.

Түркиянын прокуратурасы ушул жылдын апрель айында бул окуя боюнча 35 адамга, анын ичинде Израилдин премьер-министри Биньямин Нетаньяхуга каршы айыптоо корутундусун сотко жөнөткөн.

Айыпталуучулардын арасында Израилдин коргоо министри Исраэль Кац, мурдагы коргоо министри Йоав Галант, улуттук коопсуздук министри Итамар Бен-Гвир, Башкы штабдын башчысы Эяль Замир жана башка жогорку кызмат адамдары бар.

Кандай айыптар коюлду?

Түркиянын прокуратурасы Израилдин жогорку жетекчилигине бир катар оор беренелер боюнча айып тагууда.

Алардын арасында:

адамзатка каршы кылмыштар;
геноцид;
эркинен мыйзамсыз ажыратуу;
атайылап денеге залал келтирүү;
кыйноо;
талап-тоноо;
мүлктү жок кылуу же зыянга учуратуу;
транспорт каражаттарын басып алуу беренелери бар.

Прокуратура бардык айыпталуучуларга өмүр бою эркинен ажыратуу өкүмүн чыгарууну талап кылууда.

Израиль айыптоолорду четке какты

Израил бийлиги Түркиянын айыптоолорун кабыл алган жок.

Тель-Авивдин маалыматына ылайык, Global Sumud флотилиясы Газа тилкесине коюлган деңиз блокадасын бузууга аракет кылган. Израиль буга чейин өлкөнүн деңиз чек арасын мыйзамсыз бузууга жол берилбей турганын бир нече жолу эскерткенин белгилеген.

Израил тараптын маалыматына ылайык, 2026-жылдын май айында 54 кемеден турган жана 39 өлкөдөн келген 426 адам катышкан флотилия кармалган. Кемелер Израилдин портторуна жеткирилип, алардын бортундагы активисттер кармалып, кийинчерээк өлкөдөн чыгарылган.

Эрдогандын билдирүүсү

Май айында Түркиянын президенти Режеп Тайып Эрдоган Биньямин Нетаньяху жакын арада дүйнө мусулмандарынан "сабак аларын" билдирген.

Белгилей кетсек, Түркия менен Израилдин ортосундагы мамиле Газа тилкесиндеги согуштук аракеттерден улам акыркы жылдары олуттуу чыңалып, Анкара Израилдин аракеттерин бир нече жолу катуу сынга алып келет.