Каннабис компоненттери бар продукцияны сатуу менен алектенген топтун ишмердүүлүгүнө бөгөт коюлду (видео)

Социалдык тармактар аркылуу каннабис өсүмдүгүнүн компоненттери бар продукцияны жарнамалоо жана сатуу менен алектенген топтун ишмердүүлүгүнө бөгөт коюлду.

ИИМден маалымдашкандай, Суусамыр өрөөнүндөгү Туура-Суу айылында өтүүчү фестивалда каннабис өсүмдүгүнүн компоненттери бар продукцияны жарнамалоо жана сатуу тууралуу маалымат келип түшкөн. Милиция кызматкерлери бул продукциянын үлгүлөрүн алып, соттук-химиялык экспертизага жөнөткөн. Жыйынтыгында эки таңгактын курамынан марихуана баңгизаты табылган.

Бул факты боюнча Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча кылмыш иши козголгон.

Ыкчам издөө иш-чараларынын жүрүшүндө 1991-жылы туулган А.К., 1991-жылы туулган А.А. жана 1988-жылы туулган А.А. аттуу жарандык активисттер кармалган. Кармалган жарандардын үйүнө тинтүү жүргүзүлүп, каннабис майы баңгизатын камтыган эки бөтөлкө зат, 4 грамм марихуана, 1 килограмм 860 грамм болгон каннабис өсүмдүгүнүн уруктары табылган. Ошондой эле "М" дүкөнүнөн курамында каннабис өсүмдүгүн камтыган чай, ун, май, спрей жана витамин капсулалары табылган.

Учурда кошумча тергөө иштери уланууда.