Индияда аялы күйөөсүн сари сатып бербегени үчүн өлтүрдү деп шектелүүдө

Индиянын Тхана шаарында 30 жаштагы аял күйөөсүн өлтүрүүгө шектелип кармалды. Бул тууралуу чет өлкөлүк маалымат каражаттары билдиришти.

Маалыматка ылайык, 19-июлда күйөөсү аялы сураган сарини сатып алууну унутуп, үйгө куру кол келгенден улам уруш чыккан. Жубайлардын ортосунда жаңжал болуп, ал бара-бара мушташка айланган. Ошол учурда үйдө алардын 7 жаштагы баласы ата-энесинин ортосундагы жаңжалды көрүп, жардам сурап кошуналарга чуркап кеткен. Бирок кошуналары келгенде эркек каза болуп калган.

Тергөө маалыматтарына караганда, аял күйөөсүнө үйдөгү буюмдар менен кол салып, кийин аны муунтканы айтылууда. Аял алгач күйөөсү жүрөк оорусунан улам каза болгонун билдирген. Бирок полиция иликтөө жүргүзүп, өлүмдүн чыныгы жагдайларын аныктаган.

Аялга карата киши өлтүрүү беренеси боюнча кылмыш иши козголуп, ал 29-июлга чейин камакка алынды. Акыркы чечимди сот чыгарат.