Акчасын бербейм деп... Милиция сыра саткан дүкөндө сабалган аял боюнча үн катты

Өзгөндө сатуучу аялга кол салуу боюнча териштирүү жүрүп жатат. Бул тууралуу Ош облустук милициясы маалымат берди.

Маалыматка ылайык, окуя 22-июлда Дөң-Булак айылындагы сыра заводунун жанындагы дүкөндө болгон. Анда мас абалындагы эркек кишилер алган спирт ичимдигин акчасын төлөөдөн баш тартып, жаңжал чыгарышкан. Анын жүрүшүндө эс алуу жайынын администратору, 1984-жылы туулган А.К. сабалып, денесинен жаракат алган.

Жабырлануучуга соттук-медициналык экспертиза дайындалып, окуяга тиешеси бар адамдардын өздүгү аныкталды. Учурда тергөө амалдары уланууда.

Белгилей кетсек, бул окуянын видеосу социалдык тармактарга тарап, коомчулуктун кызуу талкуусунда.