Бишкектеги мектепте билими жоктор сабак берип келишкени аныкталды

Бишкектин №28 мектеп-комплексинде билим берүү жана финансылык тармактагы мыйзам бузуулар аныкталды. Бул тууралуу Башкы прокуратура билдирди.

Маалымдалгандай, айрым мугалимдердин билими ээлеген кызмат ордуна жана окуткан сабагына шайкеш келбейт. Мектеп директорунун орун басарынын педагогикалык билими жок болгон. Ошондой эле айрым кызматкерлер эмгек милдеттерин аткарбаса дагы мыйзамсыз айлык акы алып турушкан.

Мындан тышкары, мектепке чейинки бөлүмдө тарбияланып жаткан айрым балдар каттоого алынган эмес. Мындан улам ай сайын төлөнүүчү акча каражаттары кассага түшкөн эмес.

Натыйжада, чара көрүү актылары киргизилип, мыйзамсыз сарпталган акча каражаттары толугу менен бюджетке кайтарылып, мектептин директору жана анын орун басары ээлеген кызматынан бошотулган.