Жеки Чандын Бакудагы тасма тартуу иштери аяктады (видео)

Кечээ, 17-августта Баку шаарында белгилүү актёр Жеки Чандын "Кудайдын сооту. Ультиматум" тасмасынын тартуу иштери аяктады. Бул тууралуу тасманын чыгармачыл тобу социалдык тармактарда видео жарыялады.

Тасманын Бакудагы тартуу иштерине 26 мамлекеттик мекеме жана уюм колдоо көрсөткөн. Ошондой эле долбоорго 200дөн ашык жергиликтүү адис жана Азербайжандын ондогон компаниясы тартылган.

Тартуу иштери аяктагандан кийин Жеки Чан тасмага колдоо көрсөткөн мамлекеттик органдардын жана компаниялардын өкүлдөрү менен жолугушкан. Актёр долбоорду ишке ашырууга көмөк көрсөткөн тараптарга жеке өзү ыраазычылык билдирип, эстелик белектерин тапшырган.

Мындан тышкары, тасманын тартуу тобу Азербайжанда күйөрмандардын Жеки Чанга жана жаңы тасмага болгон кызыгуусу жогору болгонун белгилеп, жергиликтүү шаар тургундарына колдоосу жана жылуу кабыл алуусу үчүн ыраазычылык билдиришкен.