БАЭ витилигого каршы дарыга биринчи болуп уруксат берди

Кечээ, 17-августта Бириккен Араб Эмираттары витилигонун сегменттик эмес түрүн дарылоого арналган таблетка түрүндөгү дары каражатын колдонууга дүйнөдө биринчи болуп уруксат берди. Бул тууралуу Khaleej Times басылмасы жазды.

Эмираттардын Дары-дармек агенттиги RINVOQ (упадацитиниб) дары каражатын 12 жаштан жогорку өспүрүмдөргө жана чоңдорго, ооруну системдүү дарылоо талап кылынган учурда колдонууга уруксат берди. Дары каражаты күнүнө бир жолу ооз аркылуу кабыл алынат.

Витилиго - теринин айрым бөлүктөрүндө пигменттин жоголушу менен мүнөздөлгөн оору. Ал меланин өндүргөн меланоциттердин бузулушу менен байланыштуу. Оорунун так себеби белгисиз, бирок аутоиммундук реакция негизги факторлордун бири катары каралат.

Адистер дары каражатын дарыгердин көрсөтмөсү менен гана колдонуу керектигин эскертишет.