Кыргызстандыктар Pinduoduo платформасына 9 миллиард сомго жакын акча коротушкан

Салык кызматы Кыргызстандагы электрондук кызмат көрсөтүүчү чет өлкөлүк уюмдар милдеттүү түрдө салыктык каттоодон өтүүгө тийиш экенин эскертет.

Учурда электрондук кызмат көрсөтүүчү 73 чет өлкөлүк компания салыктык каттоодон өткөн. Ошол эле учурда салыктык каттоодон өтпөгөн ири финансылык жүгүртүүгө ээ болгон 11 чет өлкөлүк компания аныкталган. Алар:

Alibaba Group Holding Limited (1688);
Shanghai Xunmeng Information Technology Co., Ltd. (Pinduoduo);
Twitch Interactive, Inc.;
Microsoft Corporation;
Valve Corporation;
Sony Interactive Entertainment LLC;
Epic Games Inc.;
Electronic Arts Inc.;
VK Company Limited;
Telegram FZ-LLC;
Dropbox Inc.

2024–2025-жылдар аралыгында гана аталган компанияларга 15,9 миллионго жакын акча которуу жүргүзүлүп, алардын жалпы суммасы 13,2 миллиард сомго жакын каражатты түзгөн. Акча которуулардын эң ири көлөмү төмөнкү компанияларга туура келген:

Shanghai Xunmeng Information Technology Co., Ltd. — 8,89 миллиард сом;
Alibaba Group Holding Limited (1688) — 2,83 миллиард сом;
Microsoft Corporation — 1,01 миллиард сом.

Компанияларга салыктык каттоодон өтүү боюнча бир нече жолу расмий каттар жөнөтүлгөн. Бирок бүгүнкү күнгө чейин кайрылууларга жооп берилген эмес. Мындан ары дагы салыктык милдеттенмелер аткарылбаса компаниялардын электрондук сервистерине өлкө аймагына кирүүнү чектөө маселеси каралат.