Якутияда федералдык издөөдө жүргөн кыргызстандык маңзат сатуучу кармалды

Орусиялык Баңгизатты көзөмөлдөө кызматы тарабынан эл аралык издөөдө жүргөн кыргызстандык маңзат сатуучу кармалды. Аталган кызматтын берген маалыматына ылайык, кармалган адам 2003-жылы эле Якутиядагы маңзатты сатуу каналын түзүп алган. Бул ишке аялын да аралаштырган. 

Баңгизатын мыйзамсыз ташууну көзөмөлдөө бөлүмүнүн кызматкерлери жубайларды баңгизатты сатып жаткан жеринен колго түшүрүшкөн. Алардын жашап турган батирин тинтүүгө алганда ири өлчөмдөгү гашиш табылган. Бул факты боюнча кылмыш иши козголгон. Тергөөнүн жүрүшүндө 38 жаштагы үй-бүлө башчысына Орусиянын аймагынан сыртка чыкпоо боюнча чечим чыккан. Бирок ал мекенине качып кетип, аты-жөнүн өзгөртүп жашап калган. Мындан улам ага федералдык издөө салынган. 2014-жылдын январь айында укук коргоо органдарына сатуучунун Якутияга келгени тууралуу маалымат түшөт. Ал Нерюнгри - Новосибирск поезди аркылуу башка аймакка чыгып кетүүгө аракет жасаган учурда колго түштү.