Сербияда мөөнөтүнөн мурда парламенттик шайлоо 25-октябрда өтөт

Бүгүн, 9-сентябрда Сербиянын президенти Александр Вучич парламентти таркатуу жана мөнөөтүнөн мурда шайлоо дайындоо боюнча чечимдерин жарыялады. Бул тууралуу чет элдик басылмалар жазышууда.

Маалым болгондой, парламенттик шайлоо 25-октябрда өтөт.

Вучич атаандаштарды шайлоо өнөктүгү учурунда баш аламандыкка барбоого чакырды. Ал эми шайлоонун жыйынтыгын кандай болбосун кабыл алып, жеңгендерди куттуктаарын да баса белгиледи.

Эскерте кетсек, Сербияда Вучичтин кызматтан кетишин талап кылган акциялар 2024-жылдын 1-ноябрында Нови-Сад шаарындагы темир жолдо имарат урап, 16 жаран каза болгондон кийин күч алган. Вучичтин президенттик мөөнөтү 2027-жылы аяктайт. Ал эми парламенттик шайлоо 2027-жылдын декабрында өтүшү керек болчу.