Ош юстиция башкармалыгынын жетекчиси Уларбек Жунусов дүйнөдөн кайтты  

Ош юстиция башкармалыгынын жетекчиси Уларбек Жунусов мезгилсиз дүйнөдөн кайтты. Бул тууралуу бүгүн, 9-сентябрда Юстиция министрлигинен билдиришти.

Жунусов 1981-жылы Ош облусунун Өзгөн шаарында төрөлгөн. Юридикалык билим алып, эмгек жолун 2001-жылы Конституциялык сотто консультант болуп баштаган. Ал жылдар бою Конституциялык сотто, прокуратурада, Мамлекеттик салык кызматында, Жогорку Кеңеште жана Сот департаментинде эмгектенген. Юстиция тармагында да көп жыл иштеп, жардамчыдан жетекчинин орун басарлыгына чейин жеткен. 2021-жылдын декабрынан бери Ош юстиция башкармалыгын жетектеп келген.

Министрлик маркумду кесипкөй, жоопкерчиликтүү жана принципиалдуу жетекчи катары эскерип, анын үй-бүлөсүнө жана жакындарына көңүл айтты.

Маркумдун артында жубайы жана 5 баласы калды.