Ош мэриясы 61 жаранга жер тилкесинин мамлекеттик актыларын тапшырды

Ош шаарында мамлекеттик муктаждык үчүн жер тилкесин берген 61 жаранга бүгүн кызыл китептери тапшырылды. Бул тууралуу шаардык мэриядан билдиришти.

Маалыматка ылайык, жаңы муниципалдык базар жайгашкан жер тилкелеринин менчик ээлери менен сүйлөшүүлөрдүн жүрүшүндө алардын укуктарын эске алуу менен жердин 10 пайызы өлчөмүндө жеке менчикке жер берүү боюнча макулдашуу жетишилген.

Бул багытта тиешелүү трансформация иштери жүргүзүлүп, документтер толугу менен даярдалган. Ош шаарынын мэри Жанарбек Акаев 61 менчик ээсине мамлекеттик актыларды өзү тапшырды.

Жалпысынан 3 гектардан ашык жер тилкеси коммерциялык багытта трансформацияланып, ар бир менчик ээсине 100 чарчы метрден жер жеке менчикке өткөрүлүп берилди.

Эми жарандар өздөрүнө берилген жер тилкелерин коммерциялык багытта пайдалана алышат.

Мэрия мамлекеттик муктаждык үчүн жер берүүдө жарандардын укуктары жана кызыкчылыктары мыйзам чегинде корголорун белгиледи.