Бишкектин жолдорун кытайлык компания изилдеши мүмкүн

Бишкек шаарынын мэри Айбек Жунушалиев Кытайдын Чанша шаарына болгон иш сапарынын алкагында Hunan Construction Investment Group компаниясынын жетекчилиги менен жолукту.

Борбор калаа бийлиги кечээ, 20-сентябрда кабарлагандай, жолугушуунун негизги темасы Бишкек шаарынын жол инфраструктурасын өнүктүрүү болгон. Тараптар шаардагы жолдорду куруу жана реконструкциялоо, заманбап транспорттук түйүндөрдү куруу, ошондой эле көчөлөрдүн өткөрүмдүүлүгүн жогорулатуу жана унаа тыгындарын азайтуу максатында комплекстүү инженердик чечимдерди киргизүү маселелерин талкуулашкан.

Айбек Жунушалиев кытайлык компанияга борбор калаадагы учурдагы транспорттук кырдаалды изилдеп, шаардын жол тармагына болгон өсүп жаткан жүктөмдү эске алуу менен конкреттүү долбоорлорду иштеп чыгууну сунуштаган.