Садыр Жапаров АКШдагы лыжа курортун кеңейтүү долбоору менен таанышты

Кечээ, 20-сентябрда президент Садыр Жапаров АКШга болгон иш сапарынын алкагында Юта штатындагы "Дир Вэлли" (Deer Valley) лыжа курортун кеңейтүү долбоору менен таанышты. Бул тууралуу президенттин басма сөз кызматы маалымдады.

Белгиленгендей, анда заманбап мейманкана, турак жай, спорттук жана туристтик инфраструктурасы бар, жыл бою иштей турган жаңы курорттук кластерди түзүү каралган.

"Тоолуу аймактарды комплекстүү пландаштырууга, заманбап архитектурага, алдыңкы мейманкана бренддерин жана жеке инвестицияларды тартууга, ошондой эле суу жана башка жаратылыш ресурстарын сарамжалдуу пайдаланууга өзгөчө көңүл бурулду. Президент ошондой эле жаратылыш ландшафтын сактоого жана курортко жыл бою конокторду кабыл алууга мүмкүндүк берген инфраструктураны түзүү боюнча ыкмаларды көрүп чыкты",- деп айтылат маалыматта.