Кара-Балтада 30 жаштагы келин сабалып каза болгону айтылууда

23-сентябрда саат 10:47 чамасында Жайыл райондук ички иштер бөлүмүнө Кара-Балта шаарындагы үйлөрдүн биринен аялдын жансыз денеси табылганы тууралуу маалымат түшкөн. Бул тууралуу бүгүн, 28-сентябрда Чүй ОИИББинин басма сөз кызматы билдирди.

Маалыматка караганда, окуя болгон жерге барган милиция кызматкерлери болжол менен 30 жаштагы аялдын сөөгүн табышкан. Маркумдун өздүгү такталып, 1992-жылы туулган жергиликтүү тургун экендиги аныкталды. Алдын ала кароодо денесинен бир катар жаракаттар табылды.

Бул факты боюнча Кылмыш-жаза кодексинин 122-беренеси (Адам өлтүрүү) менен кылмыш иши козголду.

Кылмышка шектүү катары маркумдун 1988-жылы туулган жолдошу З.И. кармалганы кабарланды. Ал убактылуу кармоочу жайга киргизилип, соттун чечими менен камакка алынып, учурда тергөө амалдары уланып жатканы айтылды.