Кулубаев Гананын президенти Жон Драмани Махама менен жолугушту

Тышкы иштер министри Жээнбек Кулубаев Гана Республикасынын президенти Жон Драмани Махама менен жолугушту. Бул тууралуу ТИМ маалымдады.

Жолугушуу 1-октябрда Кулубаевдин Ганага болгон расмий сапарынын алкагында өттү. Министр Гананын президентине Кыргызстандын президенти Садыр Жапаровдун саламын жана жакшы каалоо-тилектерин жеткирди.

Кулубаев Кыргызстан Гананы Африкадагы ишенимдүү өнөктөш катары көрөрүн айтып, саясий диалогду, соода-инвестициялык жана гуманитардык кызматташтыкты өнүктүрүүгө кызыкдар экенин белгиледи.

Өз кезегинде Жон Драмани Махама эки өлкөнүн ортосундагы диалогдун жанданышын кубаттап, саясий консультациялардын маанилүүлүгүн белгиледи. Ал Кыргызстан менен соода-инвестициялык өнөктөштүктү өнүктүрүүгө кызыкдар экенин билдирди.

Тараптар эки өлкөнүн демилгелерин, анын ичинде көп тараптуу аянтчаларда өз ара колдоого даяр экенин ырасташты.