Бишкектин борборунда чет элдик жаран зордук-зомбулукка кабылганы айтылды

Бишкекте чет элдик жаранга кол салуу болуп, анын буюмдары тонолгону жана зордук-зомбулукка кабылганы айтылууда. Бул тууралуу жабырлануучунун жакындары Kaktus.media басылмасына билдиришкен.

Маалыматка ылайык, окуя 9-октябрда таңкы саат 05:30 чамасында Токтогул көчөсүндө, Свердлов райондук прокуратурасынын жанында болгон. 2002-жылы туулган жаранга 6-7 белгисиз адам кол салып, бычак менен коркутуп, акчасын, телефонун жана башка буюмдарын тартып алганы айтылат.

Жакындарынын билдиришинче, белгисиз адамдар аны даракка байлап, зордук-зомбулук көрсөтүшкөн.

Жабырлануучу милицияга арыз менен кайрылып, өз өлкөсүнүн консулдугуна да кабар берген.

Окуя боюнча Бишкек шаардык милициясы жана Свердлов райондук ички иштер башкармалыгы кошумча маалымат берери күтүлүүдө.