Француз депутаты мектептерде коопсуздук маселеси курчуп жатканын билдирди

Франциянын түштүк-чыгышындагы Обань шаарындагы мектепте ок атылып, директор жана мугалим жабыркады. Бул окуядан кийин 14 жаштагы өспүрүм кармалды. Бул тууралуу BFMTV телеканалы билдирди.

Маалыматка ылайык, окуя дүйшөмбү күнү болгон. Марсель прокуратурасы адам өлтүрүүгө аракет кылуу фактысы боюнча кылмыш ишин козгоду. Кармалган өспүрүм буга чейин Франциянын укук коргоо органдарынын көңүлүнө түшкөн эмес.

Франциянын «Улуттук биримдик» партиясынын парламенттик фракциясынын лидери Марин Ле Пен окуяга байланыштуу мектептер кооптуу жайларга айланып жатканын билдирди.

Ал социалдык тармактагы баракчасына мектептер коопсуздуктун символу болушу керектигин, бирок бүгүнкү күндө билим берүү мекемелеринде адамдардын өмүрүнө коркунуч жаралып жатканын жазды. Ошондой эле жабыркагандарга, алардын жакындарына, окуучуларга жана мектеп кызматкерлерине колдоо көрсөттү.

BFMTV телеканалынын маалыматына караганда, мектептеги атышуу Францияда уланып жаткан жогорку класстын окуучуларынын массалык нааразычылык акцияларына байланыштуу эмес.