Ош шаарынын экологиясын жакшыртуу боюнча жол картасы иштелип чыгат

Ош шаарында экологиялык абалды жакшыртуу жана туруктуу өнүгүүнү камсыз кылуу боюнча иш-чаралар талкууланды. Бул тууралуу шаар мэриясынын маалыматтык камсыздоо бөлүмү билдирди.

Маалыматка ылайык, Ош шаарынын мэринин орун басары Эрнис Толтоевдин төрагалыгы алдында Европа реконструкциялоо жана өнүктүрүү банкынын «Жашыл шаар» программасынын алкагында жумушчу топтун отуруму өттү.

Жыйында шаардын экологиялык абалына жүргүзүлгөн баштапкы баалоонун жыйынтыктары каралып, негизги көйгөйлөрдү чечүү жолдору талкууланды.

Анда абанын сапатын жакшыртуу, жашыл аймактарды кеңейтүү, имараттардын энергетикалык натыйжалуулугун жогорулатуу, суу менен камсыздоо жана саркынды сууларды тазалоо системаларын жаңылоо маселелерине көңүл бурулду. Ошондой эле коомдук транспортту өнүктүрүү, таштандыларды натыйжалуу башкаруу жана суу ташкындарынын алдын алуу чаралары каралды.

Эрнис Толтоев «Жашыл шаар» иш-аракеттер планы конкреттүү иш-чараларды, каржылоо булактарын жана инвестициялык долбоорлорду камтыган практикалык жол картасы болушу керектигин белгиледи.

Учурда ЕРӨБ өкүлдөрү жана эксперттер менен биргеликте иш уланууда. Алдыда энергетика, имараттар, суу ресурстары жана транспорт багыттары боюнча кошумча талкуулар өткөрүлүп, тиешелүү сунуштар иштелип чыгат.