Убагында УКМК тартып алган Кызыл-Кыядагы консерва заводу ээсине кайтарылат (видео)

Кызыл-Кыяда УКМК тартып алып, мэрияга өткөрүлгөн консерва заводу ээсине кайтарылат. Бул тууралуу кечээ, 12-октябрда президент Садыр Жапаровдун Кадамжай районунун жана Кыязыл-Кыя шаарынын тургундары менен болгон жолугушуусунда маалым болду.

Аталган жайдын ээси Бердигул мырза өлкө башчысына кайрылып, чет өлкөгө чыга турган азыктар өндүрүлбөй, ишкананын адистери тарап кеткенин билдирди. 50 жыл тынымсыз иштеп жаткан завод өткөн жылдын октябрь айынан бери токтоп турганын ачыктады.

Мамлекет башчысы иштеп жаткан эмес, мурда менчиктештирилип, бирок иштебей турган заводдорду кайтаруу керектигин эскертти.

"Биз мурда мыйзамсыз менчиктештирилип, арзан баага сатылып кеткен, бирок иштетилбей турган заводдорду мамлекетке кайтарып, инвестор таап иштетүү саясатын айтканбыз. Бирок “Бөрк ал десе, баш алган” замандай болуп кетиптир. Иштетип жаткан заводду тартып алган экен. Мэрияга берип коюп, иш токтоп калды. Күч түзүмдөрү отурасыңар. Иштеп жаткан өндүрүш болсо тийбегиле. Кайра башынан сылап, "иштет, 50-100 жумушчу орун бер" дешибиз керек да",- деди Садыр Жапаров.

Президент сөз аягында күч түзүмдөрүнө эскертүү берип, заводдун ишин уланта албаганы үчүн мэрияны сынга алды. Ошондой эле комиссия түзүп, заводду кайтарып берүү тапшырмасын берди.