Жылдыздар Шри-Ланкада крокодил менен таанышышты    

Шри-Ланкадагы кыргызстандык жылдыздардын эс алуусу эстен кеткис окуялар, кызыктар менен коштолууда. Инд океаны менен таанышып, толкун менен жарыша сууга түшүшкөн соң Бентота дарыясына сейилге чыгышты. Цейлон аралындагы суусу мол деп саналган бул дарыя Инд океанына куят. Мелмилдеп жаткан дарыя бир көргөн адамга жагымдуу, тынч, коопсуз туюлушу мүмкүн. Бирок иш жүзүндө андай эмес. Бир нече саатка созулган бул саякатта эс алуучулар эки ирет жээкте үргүлөп жаткан крокодилге туш болушту. Ооба, биринчиси кичинекей, гиддердин айтымында, 6-7 айлык, экинчиси өзүнүн жырткыч табиятын көрсөтүүгө жарай турган куракта эле. Таң калтырганы, мындай коркунучтарга карабастан, Бентотанын жээгинде кооз виллалар, отелдер абдан көп. Кезектеги вилланын жанынан өтүп баратканыбызда коштоп жүргөн гид жээкти көрсөтүп калды. Заңгыраган үйгө 5 метрдей жакын жерде ийриле килейген эчки эмер жатыптыр. Күнөстөп жаткандай туюлду бизге.

Жергиликтүү калктын көпчүлүгүнүн тиричилиги туристтер менен байланыштуу. Атүгүл айрымдар крокодилдин баласын кармап, дайындап алып буйткалуу жерге сёрфингдин тактайчасын элестеткен тактайда калкып туристтерди күтүп отурушат. Цейлондун кызыктарын көрүүгө ашыккан туристтер мына ушул кичинекей крокодилдер менен сүрөткө түшүп, чай пулун таштап кетишет. Ушинтип тиричилик өткөргөндөр көп экен.

Өнөр адамдары бар жерде сейил-саякаттар кантип ырсыз өтсүн? Табияттын кереметине таасирленген Каныкей көпчүлүктүн суранычы менен "Куурчак" деген ырын аткарып да берди.

Эскерте кетсек, «Супер-Инфо» көп жылдан бери жемиштүү кызматташып келе жаткан ырчы Каныкейге, рэпер Добрга, чечендикте алдына киши салбаган алпаруучу Нурзат Токтосуновага жана «Тамашоу» долбоорунун түзүүчүсү, алпаруучу Эрмек Нурбаевге гезиттин атынан кыштын ызгаардуу суугунда экзотикалык ысык өлкөлөрдүн биринде эс алууга жолдомо берген. Жылдыздар учурда "Супер сулуу-2013" сынагынын жеңүүчүсү Орункүл Шабралиева менен чогуу Инд океанындагы Цейлон (азыркы Шри-Ланка) аралында эс алып жүрүшөт.