"Бул айымда стратегия жагында маселе жок". Садыр Жапаров агартуу министрине тапшырма берди (видео)

Өлкө башчы Садыр Жапаров 24-октябрда Аксы районунун эли менен болгон жолугушууда агартуу министри Догдуркүл Кендирбаеванын ишмердүүлүгүнө баа берип, бирок санариптештирүүнү тездетүүнү тапшырды.

"Мына, иш сапарында жүргөн агартуу министри келип калган экен. Бул айымда билим жагында, стратегия жагында маселе жок. Болгону министрликте санариптештирүү нөл деп жатам. Ошол жагын оңдогула. Кайсы районго канча китеп жетти, канчасы таратылды, дагы канча жетпейт? Нарынга 15 миң китеп жиберсе, ошонун беш миңин таратып, калганы кампада жатат. Канча мугалим бар? Мына ошонун баарын санариптештирсеңер көрүп турат элеңер да", - деди президент.

Мамлекет башчысы 12 жылдык окууга өтүүдө Кендирбаеванын эмгеги чоң экенин белгиледи.

Эске салсак, Садыр Жапаров Базар-Коргон районунун тургундары менен жолугушуу учурунда агартуу министри Догдуркүл Кендирбаевага катуу сөгүш бермекчи болгонун айткан.