Лебединовка ГЭСинде жабдууларды демонтаждоо иштери жүрүүдө

Лебединовка ГЭСинде реконструкциялоо иштери уланууда. Анын алкагында гидроэлектростанциялар, электр жабдуулары, көмөк чордондор жана станциянын түтүктөрү демонтаждалып жатканын бүгүн, 26-октябрда Энергетика министрлиги билдирди.

Маалым болгондой, бузулуп алынган айрым жабдуулар "Чакан ГЭС" ишканасынын башка ГЭСтеринде колдонулат.

"Бул учурдагы техникалык ресурстарды башка энергетикалык объекттерде колдонууга мүмкүндүк берет. Лебединовка ГЭСин реконструкциялоо Европа реконструкция жана өнүктүрүү банкынын насыялары жана гранттары менен жүргүзүлүүдө. Реконструкциялоонун натыйжасында станциянын орнотулган кубаттуулугун 7,6дан 10 мегавольтко чейин көбөйтүү пландаштырылууда. Долбоор жабдууларды жаңыртууну жана натыйжалуулукту жогорулатууну камтыйт",- деп маалымдады мекеме.