«Карыларга камкордук»: Талас облусун толук камтыган жардам (видео)

«Альянс Алтын» компаниясынын каржылык колдоосу менен ишке ашырылган «Карыларга камкордук» медициналык программасынын алкагында Талас облусунун 13 миңден ашуун тургуну ден соолугун акысыз текшертип, дарыгерлерден кеңеш алууга мүмкүнчүлүк алды.

2026-жылы көчмө медициналык кабыл алуулар облустун бардык райондорунда жана Талас шаарында өткөрүлдү. Бишкектен барган дарыгерлер кардиология, урология, ортопедия, офтальмология, гинекология, онкология, терапия жана башка багыттар боюнча кеңеш берип, текшерүүлөрдү жүргүзүштү. Ошондой эле бейтаптар УЗИ, ЭХО, ЭКГ жана лабораториялык текшерүүлөрдөн өтө алышты.

Жалпысынан 13 311 адам медициналык жардам алды. Бул — облустагы 60тан 85 жашка чейинки тургундардын жарымынан көбү. 1 332 бейтап лабораториялык анализдерди акысыз тапшырды. Көпчүлүк тургундар бир эле жолу келгенде бир нече адиске кайрылып, комплекстүү текшерүүдөн өтүүгө мүмкүнчүлүк алышты.

«Карыларга камкордук» программасы 2026-жылдын жазында Таласта өткөрүлгөн алгачкы медициналык акциядан кийин пайда болгон. Тургундардын көп кайрылганы, айрыкча алыскы айылдарда жашаган улгайган адамдар үчүн жеткиликтүү жана сапаттуу медициналык жардам канчалык маанилүү экенин көрсөттү.

Долбоор «Үзүр» коомдук кайрымдуулук фонду менен биргеликте, «DOC» көп тармактуу клиникасынын дарыгерлер тобунун, мамлекеттик органдардын жана Талас облусунун медициналык мекемелеринин катышуусунда ишке ашырылды.

«Альянс Алтын» — Талас облусунун тургундарынын ден соолугуна жана жашоо сапатын жакшыртууга кошкон салым.