Садыр Жапаров "Ала-Тоо Резорт" жылына 2 миллион турист кабыл аларын айтты

Президент Садыр Жапаров Ысык-Көлдө курулуп жаткан "Ала-Тоо Резорт" туристтик кластери жылына 2 миллионго чейин турист кабыл аларын билдирди. Бул тууралуу ал бүгүн, 30-октябрда, Түркиянын Анкара шаарында өткөн Түрк мамлекеттер уюмуна мүчө өлкөлөрдүн башчыларынын 13-саммитинде сүйлөп жатып айтты.

Мамлекет башчысынын айтымында, туристтик кластер жыл бою иштөөгө ылайыкталып, 5 миңге жакын жумуш ордун түзүүгө мүмкүнчүлүк берет. Ал эми комплекстин биринчи объектисин быйыл 1-декабрда ачуу пландалууда.

Ошондой эле Садыр Жапаров боордош өлкөлөрдүн өкүлдөрүн ачылыш аземине катышууга чакырып, чет элдик ишкерлерди мейманкана, ресторан жана башка туристтик объектилерди курууга инвестиция салууга үндөдү.