Талас. Таласта Жаңы жыл майрамында жергиликтүү ырчылар элге концерт тартуулашат

Талас шаарынын мэринин социалдык маселелер боюнча орун басары Жаныбек Исраилов Жаңы жыл майрамына карата жергиликтүү бюджеттен 191 миң сом акча бөлүнгөнүн билдирди. Анын ичинен аз камсыз болгон үй-бүлөлөрдүн балдарына, ата-энесиз балдарга жана мектепте эң жакшы окуган окуучуларга жардамдар берилмекчи. 26-декабрда Атай Огомбаев атындагы музыкалык окуу жайда боло турган мэрдин жаңы жылдык концертинде ар бир балага баасы 300 сомдук белектер тапшырылат. Ал эми 31-декабрда Талас шаарынын борбордук аянтында спорттук көңүл ачуучу оюндар өтсө, кечки саат 17:00дө жергиликтүү ырчылар элге концерт тартуулашат. Ошондой эле саат 20:30да КРнын Талас облусу боюнча ыйгарым укуктуу өкүлү Койсун Курманалиева жана шаар башчысы Анарбек Кушубеков жалпы Талас элине куттуктоо сөздөрүн айтышмакчы.