Бишкекте сойкукана уюштурган Кытайдын жарандарын бошоткон милиция кызматкерлери тергөө иштеринен четтетилишти

Кызматтык милдеттерин так аткарбагандыгы үчүн Бишкек ШИИББинин тергөөчүсү жана тергөө тобунун жетектөөчүсү тартиптик жазага тартылат. Бул тууралуу бүгүн, 13-февралда Бишкек шаардык ички иштер башкы башкармалыгынын басма сөз кызматы билдирди.

Маалыматка ылайык, "сойкукана уюштургандарды өлкөдөн эч жакка кетпөө талабы менен Бишкектин Свердлов райондук соту бошотту" деген маалымат чындыкка келбей турганы аныкталды. Бул факты боюнча тергөө иштери жүргүзүлгөндө кылмышка шектүүлөрдү Бишкек ШИИББинин тергөөчүсү бошоткону белгилүү болду. Ал жана тергөө тобунун жетектөөчүсү тергөө иштеринен четтетилди.

Эскерте кетсек, 6-февралда Бишкекте сойкулук кызматын уюштурган 3 кытайлык жаран: 44 жаштагы Ян Жиаронг, 33 жаштагы Шу Шуанже жана 34 жаштагы Шу Фенгвей кармалган. Кийинки күнү, 7-февралда аларга кылмыш иши козголгон.