20-февралда Бишкекте эмгек жарманкеси өтөт

Эмгек, миграция жана жаштар министрлиги 20-февралда Бишкекте эмгек жарманкесин өткөрөт. Муну 14-февралда Бишкек мэриясы билдирди. Жарманкенин максаты - Октябрь районундагы мектептердин бүтүрүүчүлөрүнө кесиптик багыт берүү, калкты тиешелүү маалымат менен камсыз кылуу, жарандарды кесиптик билим алууга чакыруу.

Иш-чарага шаардык кесиптик-техникалык лицейлердин жамааты катышып, кесиптер жөнүндө түшүнүк беришет. Октябрь районундагы 16 орто мектептин бүтүрүүчүлөрү, 20га жакын ишкана-мекемелердин өкүлдөрү катышат. Келген жарандар керектүү кеңештерди, сунуштарды жана бош кызматтар жөнүндө маалыматтарды ала алышат. Жарманке саат 10:00дө Көк-Жар конушундагы №88-орто мектепте өтөт.