Ош. Мектеп окуучулары республикалык интеллектуалдардын сынагына катышууга мүмкүнчүлүк алышты

Ош шаардык билим берүү башкармалыгына караштуу мектептерде республикалык илим-техника жана өндүрүш жумалыгынын жыйынтыгы чыгарылып, өткөрүлгөн сынакка таланттуу балдардын иштери сунушталды. Бул тууралуу бүгүн, 17-февралда Ош шаардык билим берүү башкармалыгынын басма сөз кызматы билдирди.

Маалыматка ылайык, Ош шаарындагы 53 орто мектептин окуучуларынын колунан жаралган «Жаныбарлар жылдыздардын аталышында», «Аалам чегине саякат», «Илим-техниканын жетишкендиктери» темаларында сүрөт көргөзмөлөрү, кийиз, пайеткалар, сайма, күрүч, төө буурчак жана башкалар менен жасалган макеттер сунушталган. Мыкты деп табылган иштер республикалык интеллектуалдардын сынагына жана шаардык балдардын көргөзмөсүнө катышууга мүмкүнчүлүк алышты.

Жумалыктын алкагында өткөрүлгөн мектеп окуучуларынын олимпиадасына Ош шаарынын командасынын атынан №4-Киров мектебинен Караев Кайрат, Киргизбаев Бексултан, №20-Раззаков мектебинен Эсенбаев Бексултан, №52-«Кыргыз-Түрк достугу» мектебинен Бакытбек уулу Бексултан катышып, КРнын Билим берүү жана илим министрлигинин Ардак грамотасы менен сыйланышып, атайын сертификатка ээ болушту.