Мас адамдар менен милиция кызматкерлеринин ортосундагы мушташты токтотуу максатында ок атылды

Бишкектин Аска-Таш жаңы конушунда айдоочунун мас туугандары менен милиция кызматкерлеринин ортосундагы мушташты токтотуу максатында асманга ок чыгарылды. Бул тууралуу бүгүн, 18-февралда Бишкек ШИИББинин басма сөз кызматы билдирди.

Маалыматка ылайык, Месарош-Профсоюз көчөлөрүнүн кесилишинде Мерседес-Бенц үлгүсүндөгү кичи автобустун мас айдоочусу Жол-кайгуул кызматынын инспекторлорунун буйругуна токтогон эмес. Ал туугандарынын үйүн көздөй жөнөгөндө инспекторлор айдоочуну кармоого аракет кылышкан. Кармоо учурунда анын мас абалдагы 15-20дай тууганы милиция кызматкерлерин уруп, аларга тоскоолдук көрсөтө башташкан. Чоң мушташтын алдын алуу максатында милиция кызматкери асманга ок чыгарган.

Учурда окуянын катышуучуларын аныктоо боюнча тергөө амалдары жүргүзүлүүдө.