6 адамдан турган террордук топтун башчысы имамдын орун басары болуп чыкты

6 адамдан турган террордук топтун башчысы имамдын орун басары болуп чыкты. Ал Ош облусунун Кара-Суу районундагы мечиттердин биринде иштечү. Бул тууралуу ИИМдин Ош облусу жана Ош шаары боюнча башкы башкармалыгынын басма сөз кызматы бүгүн, 18-февралда билдирди.

Маалыматка караганда, 24 жаштагы кылмышка шектүү буга чейин Сирияда 2 жыл, Сауд Арабияда 1,5 жыл билим алган. Анын үйүн тинтүү учурунда 22 диск, 3 уюлдук телефон, 12 сим-карта, 1 ноутбук, 55 китеп, 21 баракча табылган. Алардын баары экстремисттик маанайда экендиги аныкталган. Учурда тергөө амалдары жүрүп жатат.

Эске сала кетсек, кечээ, 17-февралда УКМК маалымат тараткан. Анда Ош шаарында 6 адамдан турган террордук топ кармалганы айтылган. Алардын төртөө Сириядагы согушка катышып келгендер, экөө жергиликтүү криминалдык топтун мүчөлөрү экендиги аныкталган. Кармоо учурунда колго жасалган мылтык, ок атууга ылайыкталып жасалган газ тапанчасы, ок, чүмбөт жана скотч табылган. Кармалгандардын баары Ош шаарындагы Ички иштер башкы башкармалыгынын убактылуу кармоочу жайында.