Венесуэладагы нааразылык акциясында сулуулар сынагынын жеңүүчүсүн атып кетишти

Венесуэладагы нааразылык акцияларынын биринде белигисиз адамдар сулуулар сынагынын жеңүүчүсү Карабобо Хенесис Кармонаны (Genesis Carmona) атып кетишти. Бул тууралуу 20-февралда чет элдик басылмалар жазып чыгышты.

Окуя өлкөнүн түндүгүндөгү Валенсия шаарында болгон. Белгисиз адамдар мотоцикл менен келип, митингге чыгып жаткандарга ок чыгара башташкан. Натыйжада 22 жаштагы сулуулар сынагынын жеңүүчүсү башынан жаракат алган. Ал ооруканада көз жумган.

Хенесис Кармона Валенсиядагы университетте туризм тармагында билим алып жаткан. Ошондой эле модель болуп иштеп келген. Өткөн жылы Карабобо штатында «Туризм периси-2013» наамын жеңип алган.

Кармона 2014-жылдын февралынан баштап уланган бийликке каршы акциялардын бешинчи курмандыгы болуп саналат. 12-февралда дагы 3 адам набыт болгон эле. Өлкөдөгү баш аламандык бийлик менен оппозициянын жактоочуларынын жаңжалынан келип чыккан. Бийлик баш аламандык үчүн оппозиция лидери Леопольд Лопести күнөөлөп чыкты. Анын 18-февраль күнү полицияга өз ыктыяры менен келгени башка шаарларда толкундоолорду жараткан.