Мушкер Мухаммед Алинин чемпиондук наам үчүн беттеште кийип чыккан мээлейи 836 000 АКШ долларына сатылды

22-февралда легендарлуу мушкер Мухаммед Алинин мээлейи аукциондо 836 000 АКШ долларына сатылды. Бул тууралуу чет элдик маалымат булактары кабарлашты.

Маалыматка ылайык, мушкердин 1964-жылдын 25-февралында Сонни Листонго каршы чемпиондук наам үчүн орун алган беттеште кийген мээлейи 500 миң долларга бааланып, аукционго коюлган (быйыл бул белгилүү беттешке 50 жыл толду). Аукциондо күрөш 11 бокс сүйүүчүсүнүн катышуусунда болуп, жыйынтыгында 836 000 АКШ долларына сатылды.

Кошумчалай кетсек, Сонни Листонго каршы беттеш Алинин жеңиши менен аяктап, ал супер оор салмакта Дүйнөнүн жаңы чемпиону болуп калган.