Украина. Футбол боюнча Өлкө чемпиондугу саясий туруксуздуктан улам дагы 1 ай эс алуу алды

Кышкы тыныгуудан кийин Украинанын футбол боюнча биринчилигинин экинчи бөлүгү 28-февралда башталмак. Бирок өлкөдөгү саясий туруксуздуктардан чемпиондук үчүн жарыш 1 айдан кийин, тагыраак айтканда, 26-мартта уланат. Бул тууралуу украиналык маалымат булактары жазып чыгышты.

Маалыматка ылайык, мелдештин 19-турунун алкагында 2-март күнү Киев шаарында “Динамо” клубу донецктик “Шахтёр” клубун кабыл алмак. Андан тышкары марттын акырына чейин Украинанын чемпиондугунда, 19-тур оюндарын эске албаганда, дагы 3 турдун оюндары ойнолууга тийиш болчу.  

Кошумчалай кетсек, Киевдик “Динамо” клубу учурда УЕФАнын Евролигасында оюн көрсөтүүдө. Анын Киевде өтүүчү беттештери Украинадагы баш аламандыктан улам Кипрде өтүп жатат.