Спортчу Дмитрий Трелевскийге 6-8 аптанын ичинде операция жасалат

“Сочи-2014” Кышкы Олимпиадасына аттанып, машыгуу учурунда жаракат алган Дмитрий Трелевскийге 6-8 аптанын ичине Москвада операция жасалат. Операциядан кийин спорттук калыпка келүү кем дегенде 6 айды талап кылса да, ал чоң спортко кайтып келет. Бул тууралуу спортчу бүгүн, 28-февралда журналисттер менен жолугушуу учурунда билдирди.

Анын айтымында, Олимпиаданын трассасы өтө кооптуу болуп эсептелет. Ал Олимпиада оюндарында тоо-лыжа спортунун супергигант түрү боюнча жарышта жакшы жыйынтык көрсөтөрүнө ишенген. “Олимпиадага чейин биз негизги басымды супергигант түрүндөгү жарыштарга жасаганбыз. Сочиде бул жарыштар боюнча 10 машыгуу өткөрдүм. Онунчусунда ката кетирип, жаракат алып калдым” дейт ал.

Ал эми Дене тарбия жана спорт мамлекеттик агенттигинин директору, КРнын Улуттук Олимпиада комитетинин президенти Мурат Саралинов Дмитрий Трелевскийдин жаракат алуусунун бир себеби катары элдин ашыкча басымын белгиледи. “Бир өлкөдөн бир гана спортчу аттанып жаткандыктан, биз Дмитрийге көп басым кылып койдук” дейт ал.  

Эске салсак, спортчу супергигант боюнча жарыштардын алдында жаракат алып, “Сочи-2014” Олимпиадасына катыша албай калган. Анын ордуна 19 жаштагы Евгений Тимофеев барып, оюн көрсөттү.