Индиянын КРдагы элчилиги Ошто телемедицина борборун ачууну пландоодо

Бүгүн, 10-мартта Оштогу Облустар аралык бириккен клиникалык ооруканасында Индиянын Кыргызстандагы элчиси Жайант Н.Кхобрагаде иш сапары менен болуп, анын түзүлүшү жана материалдык-техникалык базасы менен таанышып чыкты. Бул тууралуу дипломатиялык өкүлчүлүктүн басма сөз кызматы билдирди.

Маалыматка ылайык, Жайант Н.Кхобрагаде сүйлөшүү учурунда аталган оорукана менен Индиянын медициналык борборунун ортосунда биргелешип кызматташууну уюштурууга сөз берди.

Биринчиден, Индиянын элчилиги оорукананын базасында телемедицина боюнча борбор ачууну пландоодо. Аталган борбор он-лайн режиминде Бишкек шаарындагы жана Индиядагы медициналык борборлордогу байланышты бекемдейт. Ошондой эле элчилик тарабынан Индиянын медициналык борборлорунан кыргызстандык дарыгерлердин квалификациясын жогорулатуу пландалууда.

«Бул боюнча сарпталган каражаттын милдетин элчилик өз мойнуна алат»,- деп белгиледи Жайант Н.Кхобрагаде.