2014-жылы жалпы республикалык тестирлөө өзбек тилинде өтпөйт жана тесттин баасы 40 сомго көтөрүлдү

Бүгүн, 11-марттагы маалымат жыйынында Билимди баалоо жана окутуу усулдары борборунун (ББОУБ) жетекчиси Инна Валькова “2014-жылы жалпы республикалык тестирлөө кыргыз жана орус тилдеринде гана өтөт” деп билдирди.

Анын айтымында, 2013-жылы тестирлөө өзбек тилинде да өткөн. Мындан тышкары бир тесттин баасы 220 сомдон 260 сомго көтөрүлдү. 

Белгилей кетсек, жалпы республикалык тестке каттоо 11-марттан 10-апрелге чейин жүрөт. Бүтүрүүчүлөр химия, биология, физика, англис тили, математика, тарых сабактарын тандай алышат.

Жалпы республикалык тест болжол менен 17-майдан 24-майга чейин болот. Бирок анын убактысын Билим берүү министрлиги бекитет.