Жеңиш Разаков: "Көк-Таш – Ак-Сай – Тамдык унаа жолунун талаштуу тилкесинде тоннель курулат"

Көк-Таш – Ак-Сай – Тамдык унаа жолунун талаштуу тилкесинде тоннель курулат. Бул тууралуу өкмөттүн Баткен облусундагы өкүлүнүн милдетин аткаруучу Жеңиш Разаков кечээ, 19-мартта билдирди.

Айтымында, тоннелдин узундугу болжол менен 300 метрди түзөт. Долбоордун наркы 150-180 миллион сомду түзөрү болжолдонууда.

“Учурда Көк-Таш – Ак-Сай – Тамдык унаа жолун куруу иштери токтоп турат. Буга аталган жолдун 4-чакырымындагы талаштуу жер тилкеси себеп болууда. Ал жердеги тоону жардырууга тажик тарап каршы чыгууда. 150-200 метр такталбаган жер тажик улутундагы Кыргызстандын жараны Кыргызбай Абдуллаевге тиешелүү болгон. Тажик чек арачылары чатыр тигип алышып, "ал жер биздики" деп коргоп жатышат”,- деди Жеңиш Разаков.

Ошондой эле Жеңиш Разаков кандай болгон күндө да жол салынып, Ак-Сайды көз карандысыз жол менен камсыздаш керек экенин белгиледи.