Ош облусунун мусулмандарынын казыяты ишембилик иш-чарасын өткөрдү

22-март күнү Кыргызстан мусулмандарынын азирети муфтийинин буйругунун негизинде Ош облустук мусулмандар казыятынын уюштуруусу астында облустун бардык райондорундагы мечиттердин айлана-чөйрөсүн тазалоо жана көрктөндүрүүгө багытталган ишембилик болуп өттү. Бул тууралуу бүгүн, 24-мартта аталган мекеменин басма сөз кызматы билдирди.

Маалыматка ылайык, ишембиликке казыяттын кызматкерлери да активдүү катышып, Кара-Суу районундагы Нариман, Кашкар-Кыштак, Кызыл-Кыштак жана башка бир канча айылдык аймактарга барып, жардам берип келишти.

Дагы бир өзгөчөлүк катары Ноокат районунда мечиттердин айланасын дарактар менен жашылдандыруу максатында 820дан ашуун көчөт отургузулду. Өзгөн шаарында да 30 мечиттин коргонуна көчөттөр отургузулуп, айлана-чөйрөсү тазаланып, арыктар чабылды.