Малайзиянын премьер-министри дайынсыз жоголгон учак Инд океанына кулап, жүргүнчүлөрдүн баары каза болгонун айтты

Куала-Лумпурдан учуп чыккан учак Инд океанына кулап, учактагылардын баары каза болду. Мындай билдирүүнү кечээ, 24-марттагы маалымат жыйынында Малайзиянын премьер-министри Нажиб Разак билдирди.

Ал мындай билдирүү учактын жолун көзөмөлдөгөн спутниктин маалыматына ылайык жасалганын белгиледи. Ошондой эле өкмөт башчы өз сөзүндө толук маалымат бүгүн, 25-мартта белгилүү болорун айтты.

Кечээ, 24-мартта Австралия менен Кытайдын аба күчтөрү океандан учактын сыныктары делген объекттерди аныкташкан.

Эске салсак, 8-март күнү Малайзиянын Куала-Лумпур аба майданынан Кытайдын Пекин шаарына сапар тарткан Боинг-777-200 учагы 239 жүргүнчүсү менен дайынсыз жоголгон. Учак асманга көтөрүлгөндөн 2 саат өткөн соң байланыш үзүлгөн. Акыркы жолу экрандан анын Вьетнам жана Малайзиянын ортосундагы деңиздин үстүндө учуп бара жатканы көрүнгөн.